Мужчына, які ў лістападзе мінулага года да смерці збіў жанчыну ў аддзяленні пошты ў аграгарадку Расна (Дрыбінскі раён), на момант \злачынства не асэнсоўваў сваіх дзеянняў. Пракуратура паставіла пытанне пра ўжыванне да яго прымусовых мер бяспекі і лячэння.
Паводле матэрыялаў справы, 39-гадовы мужчына раніцай 21 лістапада 2024 года ў памяшканні паштовай сувязі беспадстаўна збіў супрацоўніцу прадпрыемства, а таксама чатырох наведнікаў: трох жанчын і мужчыну. Ён нанёс ім мноства ўдараў рукамі, нагамі, металічнай трубой і фрагментам шкла па розных частках цела.
Ад адкрытай чэрапна-мазгавой траўмы 71-гадовая жанчына загінула на месцы здарэння. Іншым пацярпелым нанесеныя цялесныя пашкоджанні рознай ступені цяжкасці.
Як высветлілася, нападнік доўгі час пакутуе на псіхалагічны разлад. Эксперты заключылі, што ён «не мог усведамляць фактычны характар і грамадскую небяспеку сваіх дзеянняў і кіраваць імі».
«Ён уяўляе асаблівую небяспеку для грамадства і мае патрэбу ва ўжыванні прымусовых мер бяспекі і лячэння ў псіхіятрычным стацыянары са строгім наглядам», — паведамілі ў пракуратуры.
Такім чынам, абвінавачанне скіравала крымінальную справу ў суд з патрабаваннем ужыць да мужчыны «прымусовыя меры бяспекі і лячэння». Да суда ён будзе пад вартай.