Раніцай 3 чэрвеня расійскія войскі нанеслі ўдар па ўкраінскім горадзе Сумы. Мясцовыя ўлады паведамілі пра двух загінулых. Пазней колькасць ахвяр вырасла да трох. Пацярпелі 16 чалавек.
Асцярожна, некаторыя фота могуць шакаваць адчувальных людзей.
Паводле папярэдніх звестак, горад абстралялі з рэактыўных сістэм залпавага агню — было пяць траплянняў.
Адно з іх — па аўтамабілях, якія ехалі ў цэнтры горада.
«Каля 20 чалавек пацярпелі. Сярод параненых 17-гадовы падлетак. Таксама ёсць людзі ў цяжкім стане.
Два чалавекі, на жаль, загінулі. Спачуванні блізкім», — паведамілі ў ваеннай адміністрацыі рэгіёна.
Дзяржслужба па надзвычайных сітуацыях Украіны ўдакладніла, што загінулі тры чалавекі, яшчэ 16 пацярпелі.
У выніку траплянняў пашкоджаныя медыцынская ўстанова, аўтамабілі, шматпавярховы і тры прыватныя жылыя дамы, складскія пабудовы і гаражы.
Прэзідэнт Украіны Уладзімір Зяленскі назваў удар зверскім, адзначыўшы, што па цэнтры горада білі з рэактыўнай артылерыі.
«Вядома пра прынамсі адзін неразарваны снарад РСЗА. Гэты снарад прабіў сцяну пакоя звычайнай кватэры на 9 паверсе. Усё, што трэба ведаць пра рускае „жаданне“ скончыць гэтую вайну», — напісаў ён у сваім тэлеграм-канале.
«Відавочна, што без ціску свету, без рашучых крокаў Злучаных Штатаў, Еўропы і ўсіх, хто мае сілу ў свеце, Пуцін не пагодзіцца нават на спыненне агню», — дадаў ён.
Нагадаем, украінскі горад Сумы знаходзіцца прыкладна за 30 кіламетраў ад мяжы з Расіяй. Расійская армія рэгулярна абстрэльвае горад.
Уладзімір Зяленскі ў канцы траўня заявіў, што Расія збірае войскі на Сумскім напрамку, каб стварыць «буферную зону» глыбінёй 10 км, і ацаніў колькасць расійскай групоўкі, якая рыхтуецца да наступу, больш чым на 50 тысяч чалавек.