Украіна сваімі дзеяннямі паказвае, што яна не збіраецца здавацца, аднак такія крокі могуць абвастрыць сітуацыю. Пра гэта ў эфіры Fox News заявіў дарадца Трампа па Украіне Кіт Келаг.
«Узровень рызыкі значна павышаецца. Я маю на ўвазе тое, што адбылося ў гэтыя выходныя. Людзі мусяць разумець, што гаворка ідзе пра нацыянальную бяспеку. Калі вы атакуете частку нацыянальнай сістэмы выжывання праціўніка, якая з’яўляецца яго трыядай, ядзернай трыядай, гэта азначае, што ваш узровень рызыкі павышаецца, бо вы не ведаеце, як яны адкажуць. Вы не ўпэўненыя. І гэта менавіта тое, што яны зрабілі», — заявіў Келаг.
Паводле яго, абвастрэння сітуацыі ЗША і спрабуюць пазбегнуць. Ён дадаў, што аперацыя ўкраінскіх спецслужбаў супраць расійскіх аэрадромаў «паказала, што Украіна не здаецца» і ўзровень рызыкі можа быць павышаны да «непрымальнага».
Пры гэтым спецпасланнік адзначыў, што псіхалагічнае ўздзеянне ад праведзенай Украінай аперацыяй аказалася больш значным, чым матэрыяльныя страты.
Келаг у эфіры таксама паведаміў, што новы санкцыйны пакет для Расіі ўжо гатовы, ён скіраваны на нафтахімічную галіну, і назваў яго «дастаткова абцяжарвальным».
«На мінулых выходных я размаўляў з сенатарам Ліндсі Грэмам. Наколькі я разумею, санкцыі гатовыя. Праект называецца „Закон пра санкцыі супраць Расіі 2025 года“ (Russian Sanctions Act 2025). І я думаю, што Грэм ужо падрыхтаваў іх і гатовы ўвесці», — сказаў Келаг.
Як раней паведамляла выданне The Washington Times, у Сенаце ЗША падрыхтавалі законапраект пра новыя санкцыі супраць Расіі за адмову Крамля ад мірнага пагаднення з Украінай. Дакумент прадугледжвае ўвядзенне 500-працэнтнай пошліны на тавары з краін, якія купляюць расійскія нафту, газ, уран і іншыя рэсурсы. А таксама санкцыі супраць асоб, якія падтрымліваюць расійскую агрэсію.
Дональд Трамп заяўляў, што калі яму не ўдасца дамовіцца з прэзідэнтам РФ Уладзімірам Пуціным пра мір, то ён увядзе пошліны ад 25 да 50% на расійскую нафту. Замежныя кампаніі, якія купляюць нафту ў Расіі, не змогуць весці бізнес у ЗША, адзначыў кіраўнік Белага дома.
Яшчэ адной мерай можа стаць блакаванне расійскага ценевага флоту.